Cetan-maza   (Iron Hawk:   Oglala Culture Hero)


This tale in english!

1.   Wiyohinnape cin ekta kal heceš oyate-cikalala wan wicoti ke'.

2.   Yunkan hocoka kin itohanyankel kal wakeyala wan ciscila išnala han ca el wicaĥcalala wan winunĥcalala wan kici tila ške'.

3.   Ho, nunpin oyate-cikala wan etanhanpi k'eyaš isnp lila cikcikapila k'eyaš blihecapila nan winyan kin iyohaĥcin špulakešni ke'.

4.   Heceš hingnakula kin anpetu wan tima pel-šniyan yankin nan cannunpahela ke';   ištogmus wiyukcan yankela nan tohanlšna yablu-iyeya kakel yanka ke'.

5.   Tankal tateyanpa ca tawicula kin wipa-apiyahin nan ungna tiyopa el paiyuksa ahiyokas'in nan heya ke':

6.   "Wichaca, ito cank'in-mnikte;   tokša ĥtayetu kinhan wagli nan wakal-wayinkte," eya yunkan tunwe-wacinšni hecena, "Ho, iyaya yo, cin toke," eya ke'.

7.   Heceš wikan kakša yuha wana canyatakiya luz'ahela canke kinye s'e tuwela kin sipa acakikšin-manika ca yin nan canmahel iyaya ke'.

8.   Yunkan ungna patak-inajin ke, taku wanyaka canke - Yun-kan lece kal leca-mnitan kin un peji-šaša kin iciyuwiya psa-owinz'a s'e yunkan ca el cokaya hokšicalala wan heceya-tunpila ca t'ehowaya engalgatela ke'.

9.   Cekpa kin nahanĥcin ikoyak ĥpayela canke "Hina!   Hina!   Mitakoz'a, mitakoz'a!" eya cinktakta canha wan opapun kinogli ca icu nan un cekpa wakiciksela nan icu ke'.

10.   Yunkan ayaštan iyeyela canke heya ke':   "Hinun takoz'a, tuwa wanakiĥe-wacin lel t'eniyinkta kecin iĥpeniyan he?

11.   "Tka takoz'a nit'inkešni ye! ... Pez'i-šaša kin he wakan ye ... akanl le yaĥpaye cin, tokel nit'inkta he?" eyaya kignala ke'.

12.   Hecenaš, canlekta wašteka, ataya ektunz'in nan hokšicalala k'un yuha tiyatakiya inyanka ke'.

13.   Kiyela ku kin hehanni z'ahela s'e pan inyanka canke wicaĥcala k'un hinapa.

14.   "Wicaĥca, mitakoz'a awaku we! ... Tuwa wanakiĥme-wacinĥcin manil eĥpeya tkaš awaku we ... eš he t'eye-wacin k'eyaš wanaš taninyan epe:   T'inktešni ye, mitakoz'a!" eya ke'.

15.   Wicaĥcala k'un iš'oš'oya etkiya u ke - "Miciku!   Miciku!   Miciku!" eyaya ayugal yin nan icu ke'.

16.   " Ha o, ha o, takoz'a, anpetu-ahanzi nan cante mašica can išniš taku imakiblezinkta hunše!" eyaya yuha timahel kigla ke'.

17.   ĥtayetu wana wi mahel iyaya yunkan hokšicalala k'un ceya ke'. Canke tunkašitku kin wase keya wašin icicaĥiya iyutan nan un tancanla kin sitomniyan šaya apawintin nan kohan heya ke'.

18.   "Mitakoz'a tawoyute-cola k'eyaš icaĥwayinkte lo ... Takoz'a, itokagata ampetu wan iyakitaninšni ca hokši-kigna ukte lo;   ca takoz'a, niye ko nignakta ce;   tanpastustešni opakas'in nitawakta ce ... Wiyohinyanpatanhan iš wicaša wan wicitowancaya wanyak hinapa ca tuwa unšika wanyaka:

19.   "'Ka unšika ca ituše ni unkte,' ecankin nan eya can he icage cun wicotapi kin icignuniyan wiwaniciyake cinhan wicoicage sutaya luhakte, takoz'a!" eyaya tansinl apawintahe ceyaš ehaniĥcinš wana ištinmela ke'.

20.   Hinhanna canke anpowanka winunĥcala k'un kikta nan wana cetikta yunkan ungna hingnaku kin inaĥni-yuĥicin nan heya ke':

21.   "Wicaĥca, kikta nan takoz'a wanyanka nan ito, " eya canke ikpapakas'in yunkan hokšilala k'un e ca iyotakehan yankin nan tima tiyokšankšan wakil yanka ke'.

22.   Tošu-hute kin etanhan wankatakiya wanyak ayin nanšna tice ekta iciyakaškapi kin ekta ehunni hecunhan ke'.

23.   Canke, "Hecetu we lo, takoz'a, tanyan wakita yo ... letu ca itimahel oinicaginkta ce, iyekiya yo!" eyaya yunkan okaĥnigela s'elececa ke'.

24.   Ake ĥtayetu wi mahel iyaya yunkan ceyinkteĥcin canke ake wana wicaĥcala k'un wase wašin icaĥiya tansinl ataya ikiciun nan eyakeš iyapi k'eya un wokiciyake c'un hena ecekce eyin nan yaištinma ke'.

25.   Ihnhanna canke winunĥcala kin cetikta ca can icukta-inapin nan tiogeya hingnaku kin yuĥica ke'.

26.   "Ma keya, takoz'a el etunwan, le tokel nunke, wicaĥcala!" eye canke unštinma kikta iyotaka yunkan lece takoz'akpaku k'un wana hanskela ca iyecinka inaz'in nan ticokaya takuni igluzizešni naz'in ke'.

27.   Hecena wicaĥcala k'un iyuškin ita heya ke':   "Hunhe, hunhe, takoz'a!   Hecutu we lo!   Maka kin le tuwa takuye-inaĥni nan ecala alikta cin canšna iye pilaic'iye lo!   Hecel wicoicage sutaya yuha ye lo, takoz'a;   pilamayayin na pilaniciye lo, takoz'a!" eyaya wiyuškinyan howaya ke'.

28.   Ake ĥtayetu yunkan wi mahel iyaya hanl hokšilala kin cinktakta canke kunšitku kin tokel okuwa-ka nuntka k'eyaš sam iglaececa na hankeyaš ceya ke'.

29.   Canke ake wana tunkašitkula k'un wase wašin kcicaĥiya iyutan nan un tansinl šayela iyun nan heya ke':

30.   "Ho, ištinma yo, takoš, ištinma yo!" eyin nan eyakeš wokiciyake c'un heceĥcin ake eyaya tancanla kin pawintahin nan yuištinma ke'.

31.   Ihinhanna yunkan hihanaĥcin hokšila k'un, "Tunkašila, unci, kiktapi nan hinapapi ye!" eya un canke eĥas tukte-unma tokeya inapinkta taninšni kicipatitan inapapi yunkan hokšila wan wana hankela ca tankal okšankšan etunwan iyokipiyeĥcin naz'in ke'.

32.   Heceš tunkašitku k'un heya ke':   Hunhe, hunhe takoz'a, takoz'a, hecetu we lo!   Oipazica hena ocaicuyayinkta ce, yanuniktešni ce tanyan wanyakin nan iyekiya yo!" eyaya ke'.

33.   Wana ake ĥtayetu yunkan wanaš hokšila-hanske sece c'un, ceya ke'. Canke tunkašitku kin tansil slayin nan šayela wiyun nan heya ke':   "Ho, ito le wana ehanke takoz'a wase wecicunkte lo."

34.   Heceš tansinl wiyun nan kohan eye s'a k'un ecekce ake eyin nan wana le ĥtayetu-icitopa uunkan heya ke':

35.   "Ho, wicaša wan he wiyohinyanpatanhan hinapin nan wicitowancaya wanyak hinape cin he tuwa unšika wanyaka can unšila, nan, sam cinka can toiyoyanpa un išnala opemni na atokanyan egle can he tuwe kin okitaninyan icage c'un tunkin heca-niun ni!" eya ke'.

36.   Heceš wocekiye un tohanni kin hehan okitaninyan unkta ca wakicunza ke'.

37.   Ihinhanna yunkan hokšila k'un tunkašitku tankal kipan canke inapin nan kici maka kin wanyakapi ke'.

38.   Yunkan hehantu ca wana waunspekiya ke, takoz'kpaku kin. Taku tona wakanyawakte c'un hena ecel okiyakin nan heya ke':

39.   "Ho, takoz'a, kakiyotan wiyoĥpeyata eciyape lo. Yeciya Waĥupakoza kin ti ce kiksuya yo.

40.   "Nan he tawowaši kin tate ca kici anpetu can makoce kin awanyakape lo. Kahintapi nan tanyan yuz'az'api canke hecel un wicaša maka akantu kin zaniyan tate-wašte cuwi-mahel iwicayaya un ikiblezapi kin e yelo.

41.   "Kakiyotan iš waziyata heci oyate-luta kin ounyanpe lo. Hena ikce-wicaša wowicak'upi un oyate ni unpe lo.

42.   "Kakiyotan iš wiyohinape kin ee ca etanhan wicaša wan wokokiyeya hinapin nanšna wicitowancaya wanyak hinapin nan tuwa unšila nan iyokalya can he waš'ak.

43.   "Kakiyotan iš itokagata kin ekta wicakigna wan un ca he tohanl hi nan wamakognaka kin kigna kilowan can ištinme lo.

44.   "Wankata kin ekta iš taku wan wakanyan yanke cin he maka kin le ataya itancanyan yuha yanka ce;   nan oĥlate maka kin he iš ina-unyanpi kin e ca icaĥ-unyanpe lo.

45.   "Ho, takoz'a, wiconi kin le iyekiya yo, he wakan ye lo." eya ke'.

46.   Hecel unspekiyin nan hehanl he-anpetu kin kiyuška ke';   anpetu wan el tuwa maka akanl icaga can išnala iyaye cin he el i kin he un;   ecin tankake cin ohinni wakanhez'a gluswicaunpikte cin he hecetušni;   eye cik'apila kin el ecela;   ho,tka wana tohanl oic'ihipi can hehanl išnala iyayapi;   hecel wicoicage uye lo.

47.   Heceš wana ihinhanna yunkan wicaĥcala k'un tokiyotan iyayin nan tehan-glišni ke'.

48.   Tannake gli yunkan tatanka tucuhu wan yuha gli nan tonacan yuwaštehin na yuškopya eyuštan yunkan itazipa ca kaga ke'.

49.   Hokšila kin he itazipa wan wakanyan kicagin na henanl canpa-hu kin etan wanhinkpe ko kiyuštan nan wase un yuĥopĥopin nan k'u ke'.

50.   Hecun nan hehanl iye pa kin etan pehin wan san ca lila hanska gluz'un nan yutitan yuzin nan o-ši ke'.

51.   Canke hokšila kin wacin-ksapyeĥcin apaha naz'in nan iyayeya yunkan wicapehin k'un woslel iyeya ke'.

52.   Yunkan he wantanyeyinkta wakicunza canke hetanhan tunweni šutinktešni ca kagapi.

53.   Canke wana hokšila kin wipe-yuhalaka ca wayeyinkteĥcin nan iyaya ke'.

54.   Anpetu ataya tokaĥ'an yunkan ĥtayetu hanl maštinska wan agli na tunkašitku kin k'u ke'. He wiyoĥpeyata i nan heciyatanhan maštinska kin agli ke'.

55.   Canke wicaĥcala kin tokel-okihika iyuškin itin nan heya ke':   "Ha o, ha o, takoz'a, hecetu we lo! ... Le wicaša kin tunweni hustakešni k'un;   tunweni iyanka-okikpanišni k'un! ... ho, takoz'a, hanke yuta yo, hecel niš eya hustakešni huhu-wayazanšni ecel nikankte ... Pilanic'iyin nan pilamayaye lo!" eyaya ke'.

56.   Ihinhanna yunkan ake waye-iyaya ke'. Hehanl waziyata-kiya iyayin nan anpetu ataya un yunkan ĥtayetu hanl maka wan cep-iyakapa ca agli ke'.

57.   Canke wana ake wicaĥcala k'un iyuškin it'a heya ke':   "Ha o, ha o, takoz'a, tanyan ecanun we lo. Le wicaša kin waunšpenic'iye lo. Hanhepi, anpetu ko opta wiic'igni nan wamakaškan-swula kin iyuha tawoyute canke takuni šupe iyokišicešniyan un k'un, unyutinkta ca tanyan zaniyan takuni šupe iyokišicešniyan unk'unkte lo!" eya ke'.

58.   Ake hinhanna yunkan waye-iyaya ke'. Hehanl wiyohin-yanpatakiya iyayin nan ĥtaiyakpaza hanl glihunni yunkan ĥoka wan agli ke'.

59.   Canke ake wicaĥcala k'un hecel eš cikiye c'un eceĥcin oĥ'anyan canke un itomnila s'e howaya ke'.

60.   "Hunhunhe, takoz'a, wicaša kin le maka kin iyotanĥcin tawayelaka maheta-kiya ti ye lo. Le-anpetu kin wicaša kin le unyutinkta cnake un maka kin lila kiyela takuunyinkte lo!" eya ke'.

61.   Naic'it'ešni ecanl awaštelaka canke "Tunkašila, ake wayemni?" eya yunkan " To, to, he le waunšpenic'iciye cin, tokel he tiyatani winyan s'e nakinktelaka? To, ninkete lo! Tokša hecanunhan unhanketa woyute-tokapa kin ayaglikte," eya canke wana ka itokagatakiya iyaya ke'.

62.   ĥtayetu yunkan taĥca wan k'in agli canke wicaĥcala k'un pal iyeyin nan heyaya škan ke':

63.   "Hunhi, hunhi, tanyan wagli yagli ye lo, takoz'a, wicaša kin le iyotan wašte k'un! ... le tuwe kin pez'i nan can-inkpa-nunuz'ela, oyul-wašte kin hena kaĥniĥ-pahi yute lo.

64.   " Waĥ'anic'ila ye lo, le tuwe kin, hena woyute maka eciya-tanhan hinape cin ece-cin ye lo, hena un waš'akin nan luz'ahe cin akibleze cin un;   talo kin hanke unyutinkte lo, takoz'a, kinhan ukiš-eya waš'akya ceĥpi-wašteya unk'unkte lo," eya ke'. Canke hetanhan hokšila kin waskuya, nan maka-mahel waicage cin hena, woz'upi koko, woyuteya unšpe ke'.

65.   Wana he tatiye topa kin iyuha ekta waye-i nan hecekce agli cnake henala seca yunkan ake icizaptan-iyayin na waziyatanhan ptehincala wan agli ke'.

66.   Mila ikikcu nan iye iyunkala nige-wablas iyeyin nan tapi kin nahanĥcin ni ca naknakin nan kate cin hecena tunkašitkula kin k'u, nan, " Tunkašila, le yuta yo," eya canke iyaĥpayin nan cantokpaniĥca yaptapta yute c'eyaš taku wašte iyehanyanšni ke'.

67.   Tašiyaka kin nakun icu nan k'u canke "Ho, winunĥca, le e špan-makiya yo," eya canke špankiya ke'.

68.   Heceš wotin nan igluštan yunkan lila wowiyuškin oz'ula cnake inila yanka okihišni ke'.

69.   "Winunĥca, lila cante mawašte ca ito eyawapahakte lo." eya canke, "Tuki, cin toka ca! eya ke'.

70.   Hecena pahala wan akanl inaz'in nan ototanlaĥcin maku ziyela naz'inla nan heya ke':   "Ptehincala pi napin!" eya ke'.

71.   Yunkan ehankec'un he tašiyak-nunpa-wicašla ca hokšilala wan icaĥyela ke'.

72.   Ca lehantuke ceyaš wana wetu canšna glihunnila nanšna hecena wowiyuškin un eyapaha can, "Ptehincala pi napin!" eye s'a caš nayaĥ'unpi kin.

73.   Wanaš hece takoz'akpaku k'un waoka canke un wicaĥcalala kin lila wiyuškin un ehaš tokel ekageca nun tka, nan wana ĥtayetu canke hokšila kin ištinma-ĥpaya yunkan el inaz'in nan wacekiya ke':

74.   "Hunhunhe, mitakoz'a, cewinš owanyak-wašte ke! ... Ho, taku wakan, tunke hinhanna yunkan mitakoz'a wana koškalaka nan waš'akya hanskin nan owanyak-wašte-iyakapa nan wokoyake waštešteĥca ece hokšicalkiyapi tawa ece lel kiciyanka ca ayanpa ni!" eya ke'.

75.   Heceš iyunkapi nan ihinhanna anpao yunkan wana wakicunzapi k'un kikta nan " Tunkašila, kikta nan wanmayaka yo! Wan le taku wamiyecunze c'un iyuha iyenic'icetu welo!" eya canke wanyaka yunkan ke un akotanhan iyecetu ke'.

76.   "Ha-ye, ha-ye!" eya ke';   "Takoz'a, lena ecekce kic'un wo! Oyate hena-wicakeca k'eyaš etan tuwa lecel takoz'a-tun ka!" eyaya kic'un kin okiya ke'.

77.   Hecun nan anpetu-hankeyela eyapaha nan heya ke':   "Ho po, oyate maka sitomniyan hiyeye cin, maka akal taku škanškanyan toni gluha un kin, naĥ'unpi ye!

78.   "Le anpetu kin mitakoz'a tawoyute-cola icaĥ-waye c'un, manil t'inkta cinkiya ayuštanpi ca mniyosloslo ya yunka tka waglogli k'un, -he lehanl caz'e yukin-kta ce, nakiciĥ'unpi ye!

79.   "Wacinka yunkanš iĥpeyapi ewakiyinkta tka he iyomakipišni ca ito eyaš Cetan-maza ewakiyinkte lo!" eya maka owancaya hoyeya canke ataya ho-naĥ'unpi nan Cetan-maza anpetu-hankeyela ocaštunka ške'.

80.   Waoka canke tanyan wana tipi nan lila el wicaipi canke woimagaga icakiz'ešni unpi yunkan ungna koškalaka k'un heya ke':

81.   "Tunkašila, icaĥmayayin nan pilamayaye cin un ohinni wacicio ena waunkta wacin t'un, lehanl towaš ománi-wakinica ye lo," eya ke'.

82.   Yunkan, tunkašitkula kin itogna apeĥca lila cnante šica ke:   "Hehehe, takoz'a, canku ogna wowicašašni yunke c'un, tanyanš lel zaniyan yaun k'un!" eyaya iyokišni can ake iyenaye ca keš ake omanikteĥcin ke'.

83.   Yamni-iyokišni yešan ake icitopa-eya canke henanl wana tunkašitku kin iyowinyan ke'.

84.   "Ohan, takoz'a, yakitan ca ito ninkta ce," eyin nan milawakan wan taku k'eyaš waksa iyececa ca e nan wapoštan wan cetan-tanka-šašte num aikoyaka ca hecel k'u ke'. "Waktaya omani yo, taku wakan yunke lo, takoz'a," eya ke'.

85.   Canke wana he kic'un nan mila nan wa ko gluha kakena yahan ke'. Tehan hecel išnala ya yunkan ohanketa koškalaka top iš eya lila wakanyan owanyak-waštepi ca op ecipa ke'.

86.   Itokakin iha ayuta unpi nan wanz'i heya ke':   "Hunhi, maka opapun kin ekta koškalaka wan hokšicalkiyapi ca Cetan-maza eciyapi ocaštunke c'un! K'eyaš tuwaš lehank yela wanunyakapikta keuncinpišni!" eyapi ke'.

87.   Heyapi nan iyuškinyeĥcin itkoipapi ke'. "Ho wo, kola," eyapi, "Tokeške le omayani huwo?" eyapi yunkan Cetan-maza iĥa nan "Wan, eya ci le walemacetu kin iyuha winyanpaya ecetawacinpi ca miš eya heca un le omawani sece lo," eya yunkan, "Hunhi, kola, tanyan ye lo;   wan inkiš eya le heca un icimaunipe lo," eyapi ke'.

88.   Akeš wanz'i, "Hoye, cin tokel abeya yepica ka, iyayapi ye, owanz'ila-unyawkte," eya canke Cetan-maza:   "Ha o," eyin nan op ya ke'.

89.   Wana heceš ĥopyakel yahanpi nan tohantu yunkan ble wan tanin canke ekta-kiya cankuyapi nan wana el ihunni ke'.

90.   Yunkan mni-aglagla pez'i-hinkpila owaštecaka wan el tiska wan išnala han ke'.

91.   "Ho, letu we lo," eyapi ca wana el yapi k'eyaš wonagicunsya tiwokšan wicahu sekseca enana hiyeya ke'.

92.   Hececa k'eyaš nunge wanil el yapi yunkan winunĥcala wan sakye-kitun hinapin nan wanwicayak-naz'in ke'.

93.   Kiyela inaz'inpi yunkan, "Hinun, hinun, mitakoš wana nipe le! ... Hinapapi, taku leniceca wanniyak-hipe!" eya yunkan timahetanhan wikoškalaka keya hopapi cinla hinapapi nan wistece s'e kana inaz'inpi ke'.

94.   "Ihopi, takoš, lena eepe, hiyupi - eya ašiĥtinpike c'eyaš!" eyin nan apatan pacekcek hiyuwicaya ke'.

95.   Canke koškalaka kin yusiwicacupikta ca unma toktok iyayapi keš wana ihunnipikta canšna winunĥcala kin sakye awicapaha canš ena oz'uz'un wahe s'e gliĥpayapi ke'.

96.   Wana iš hehanl Cetan-maza el ye c'eyaš wana taku okaĥniga canke waktaya yin nan kakel wicincala wan ayugata yunkan hecena wana ake winunĥcala k'un sakye yuwankal glou tkaš oĥ'ankoya iye tokeya kute nan wan-wakan wan tunkašitku kicage c'un he un o yunkan ataya kpanyela wobleca ke'.

97.   He tunkan-winyan canke wakan-wakapa hel un tkaš Cetan-maza kte ke'.

98.   Hecena inikagin nan takolaku k'eya t'e s'e ĥpayapi k'un iyuha wicayukini nan winyan wicak'u canke tokiyotan awicakiyaglapi ke'.

99.   Yunkan leyalaka henakeĥcin wakinyan-wicašapi canke iyoĥa anunkatanhan wakagli yuglakšikšan hukutakiya ceca ouya ĥpayi nan si kin ekta okiz'alya okiwanz'ila iyeĥyeĥya hanke, ecahan ke'.

100.   Nan ištihanke kin eciyatanhan nakun wakangli hiyu nan hena iš isto-ounya yin nan nape kin akanl okiz'ata ca hena iš eya eca-iyeĥyeĥya han ke'.

101.   Iyayapikta yunkan itokap Cetan-maza wokiyakapi ke';   "Ho wo, Cetan-maza, Nitaoyate - niyate, hihun, nitunkašila, nikunši, niciye, nitanhanši, hihakata, nicinca hena iyuha owicakiyaka yo, letanhan niho kin he ituya yeyainktešni ce;

102.   "Nakun maka-mahel nunkin nan houyaye c'eyaš naunĥ'unpi nan ekta uniyanpikte ce;

103.   "Oglaka yo, le-anpetu kin wakinyan kin takuyaye lo," eyapi ke'.

104.   Ho, yunkan wicakapi ca Cetan-maza tohan-ni k'un hehanyan tohanl iyotiyekiyin nan wakinyan kin awowicaglaka canšna išnalaš oĥ'ankopi canke aškan s'e hihunnipi nan okiyapi ke'.

105.   Hetanhan waziyatakiya icimani ke'. Yunkan wicaša wan manil akipa k''eyaš tuwe kin hanskin nan lila woimnaka ke'. Tanyan igluzin nan owanyak wašteĥca ke'.

106.   Tahakalala-ogle wan ziyapi ca un nan eya toketuke c'eyaš lila aiglupi ke'.

107.   "Hunhi, hunhi, kola Cetan-maza he niye huwo? ... Hunhi, wan, kola, tokeške le omayani he?" eya canke wana ake wiyapaya-omani keya-oglaka yunkan heya ke':

108.   "Hunhi, kola, wan miš eyá le hecel un omawani ca sakip unyinkte lo," eya canke wana yapi yunkan wicoti wan oiyokipiya el wicaškan ca wanyak iyahanpi ke'.

109.   "Ho, kola, katu we lo," eya ke'. "Ka cokap tipi wan he cin hetu ca le hokšicalkiyapi wan winyan waštep cila ca ti k'eyaš atkuku kin lila glonica nan lel kiyela tuktel makoĥloka-mahetuya wan ekta kanpeska ota ca etan tuwa kagli hantanhanš ecela winyan k'ukta keye lo.

110.   "Lila mahetuya nan kanpeska kin oicu-šila hiyeya ca tuwa iyuta keš ektani ohinĥpayin nan ot'e lo," eya ke'.

111.   "Hunhi, kola, taku weš le iyutapi kin, iwiškaš oicu-teĥika nacece ce," Cetan-maza eya, yunkan hecena, "Hoĥ, aoš'akelake lo, wan. Ho, k'eyaš yacin hantanhanš sakip unyin nan ito iciyokiheya unkotkin nan etan icu-wauncinkte," eya canke "Hoye," eya ke'.

112.   Wana el ipi k'eyaš wašun wan mahetakiya otankaya k'eyaš tiyopa-kaĥya oĥloka kin etan takuni iali-picašniyan han ke'.

113.   Wana wicaša kin, "Ho, kola, matete kin lel sutaya yus zezeya otke-mic'iyinkta ce amalikel kutkiya yin nan si el omayuspin nan kohan nap-sani iyohiyaya hantanhanš kanpeska kin tonakel icu wo.

114.   "K'eyaš hayapi waštešte nun we lo, glušlokin nan hacola ecun wo, hecel oškinciye-niwašte kte;   agna waštešte k'un yagluĥ-lecinkte sece," eya canke iyuha ecel ecun ke'.

115.   Wana wicaša k'un hanskelaĥcaka canke hukutakiya zezeya otke eyaš cete kin ihunni nun s'e hehanyan ke'.

116.   Heceš Cetan-maza wana oskapya oslohe-ic'iyin nan si kin nap-sani un oyuspi nan nape-unma un pankeska tonkel wana icu nan wicaša k'un eya hecel ecunši ca tahunska el opatica ke'.

117.   Wana iš hehanl etan iíc'ikukta ca yugal-iyeye ĥcehanl ungna wicaša kin nagwagwakin nan naĥtaĥtaka canke napakašpeyaya nan ayuštan ca ceteta gliĥpaya ke'.

118.   "Kola, toka huwo?" eya un keyaš ecanl el nunge yuzešni waš'aka canke tokašniyan glinapin nan Cetan-maza tahayapi k'un iyuha ecekce un nan iyaya ke'.

119.   "Kagi-mayan tka! ...Nakeš wana okblaya wicawoĥamninkte," eyaya ehank'un wana hokšicalkiyapi-igluzin na hocokatakiya ya ke'.

120.   Iš oyate ognaye-waštepi s'a ke cin, el ye c'un hehanni ikikopi nan "Cetan-maza he e ca u we lo, hokšicalkiyapi wan maka ipapun kin eciyatanhan otanin k'un he e ye lo!" eyaya icinatanpi nan yus wicaša-yatapi ti kin el akipi ke'.

121.   Kanpeska k'eya hunskatanhan ikikcu nan wicaša-itancan kin k'u canke hecena lila kicilowanpi nan ohitike-kiyapi;   ecin tuweni heca icu okihišni tka canke he un.

122.   Hecenaš winyan k'upi canke kal anpetu-hankeyela wicawoĥa-eti ke'.

123.   Tawicu kin lila teĥilapi nan yuwaĥ'anic'ilapi canke tanyan hingnatun-ic'ila itan un ehaš oĥ'an-šica ke'.

124.   Tankakula wan wicincala wana iš eyaš wikoškalaka cik'ala ca cuweku hingnatun-eti kin el ya canšna itkop kišica ke'.

125.   "Ako gla na! ... ektan wicaša wanmakiyak-wacin, ištawašteka ca!" eya-oštegla canke toketkiya ceya iyaya ke'. K'eyaš hokši-hakaktala canke tuwenikel el etunwešni, cuweku hingnatun kin ecela un ikik'opi ke'.

126.   Kohan he makoĥloka wan ekta Cetan-maza yanke c'un hel ikiyela wicaĥcalala wan tawicu kici manil tipi ke'.

127.   Yunkan he winunĥcala kin e ca can leya keyin nan oĥloka kin ikiyela hiyaye ĥcehanl tokiyap hokšicala wan ceya naĥun canke ena patak inaz'in nan tan-anagoptan yunkan heciya cete kin ekta ca tuwa ceya canke blaska-iyunkin nan eyokas'in ke'.

128.   Tan-wanyakešni, išta-aecetušniyan wawanyakela nan agna oĥloka kin oiyokpaze c'eyaš wanaš he wakanhez'a kin slolya canke heya ke':   "Hina, hina!   Taku sam tawacin-hinyans awicaye! Oyate kin le eca takupika ca!" eyaya ceya iyaya ke'.

129.   "Hinyanka, takoz'a, tokša icicukte!" eya inyankyank kignin nan itap sata hanska wan wikan wan ikantunyan ahi nan kiutakiya gliheya ke'.

130.   "Ho, takoz'a, inihunni hecinhan, wikan kin hel ogna ihin nan can kin kaskita yus un, tokša ciyuslutinkte!" eyin nan wany wankatakiya aku k'eyaš tkelaĥcaka ke'.

131.   Yuakanl, agligle yunkan lece hokšilala wan naz'ute ĥlila ca unšiyeĥcin ececala ke'.

132.   Hecena kic'in, aki yunkan wicaĥala kin iyuškin it'in nan "Ho, winunĥca tanyan ecanun we lo; ... išniš takoz'a imagagamayinkta hunše ... Kan amaye cin ecel cante mašice s'a k'u!" eyaya yutima icu ke'.

133.   Iyecala hokšila kin heya ke':   "Tunkašila, takan etan wacin ye lo," eya canke, "Hunhi, tokcanunkta he, takoz'a? ... wan, takoz'a takan la ye lo, winunĥca!" eya canke etan mahel wiyakapanla wan ogna yuha ca ikikcu nan k'u ke'.

134.   Hecena tunkašitku kin takan kin hena pagmunkiyin nan un cangliška iyuskiskiya kagin nan timahel otkeya ke'.

135.   "Ho, tunkašila, unci kici paha-aisinyan yapi nan heciya owanz'i yanka po, tokša ekta ciupikte," eya canke, "Toka huwo?" ecinĥca tawicu kici iyaya ke'.

136.   Heceš išnala tima tokeškeške wakan-ĥ'an nacece c'eyaš wanyakapišni, itohantu yunkan ekta wicahiyoi canke kici glipi ke'.

137.   Yunkan tima zitkala yul-pica kin heca ece, magaksica na iš maga-šapa obe kin oyas'in tima okinyan unpi ke', šiyo koko. Si kin tuktektel ikoyakapi'.

138.   Z'akyap s'e hena iyuha hotun unpi canke nunge wicayakpapi nun s'e lecece ke'.

139.   "Ho, wicakte po na owicahan po," eya canke tunkasitkula ku takolaku op wakanwašteya sitkokuwa škanpi nan iyuhaĥcin wicaktepi ke'. Pa kin hena si kin iyayustastak egnak-wicaši canke ecunpi yunkan hehanl mniyohutata iyuha ai nan "Ho, iyayapi nan igluota po!" eya-hingla mniyokaĥlol iye-wicaya canke tokeya wikcemnamna nan hankeya opawingege ošpayetuntunya mni p'oyela iyayapi ke'.

140.   "Unci, ceĥololya yo, ito oyate wotapikte," eye c'eyaš lila winunĥcala kin tawat'elyelašni ke'.

141.   "Taku, wana tehan manil wati ca wimaštece c'un. Tuwa cega owakilotin naš omak'upi ka!" eyaya naĥlal un k'eyaš "Takoz'a tokel eye cin ecel ecun ye, iš takuĥca yake! ... Hokšila wan wakunpi s'e wakan ca iyeunkic'iye cin el lehahe lo!" eya iyopeka canke wana ka šina ikikcu nan kicunniyeĥcan iyayake'.

142.   Yunkan winyan wan tiihanke el ti canke el i nan okiyaka yunkan waštecake canke ceĥok'u nan kici gli ke'.

143.   Okiya can hena iyuha iyoĥpewicayapi k'eyaš sam ota aya canke tokeni h'unhiye-picašni ke'.

144.   Hingnaku kin ihakap hi nan wana kal Cetan-maza tunkašitkula kin kici kat'eyetanka iyotakin nan opagipi tkaš ecanl heya ke':

145.   "Wan, tunkašila, tohantuka keš cannunpapi ye, wan, le woyute wanica ca wicoti kin ataya wotapikte;   eyapaha ye!" eye canke kakena eyapaha-iyaya ke'.

146.   "Hopo, ka manil tipi wan he cin hel ape lehanl wayatapikta ce, el hiyayap!   El hiyayap!   Tiwepa nakitakapi nan u po!" eya howokawinĥ glihunni k'eyaš ehanniš wana hocokatunyan topaowecinhan ahiyotaka ke'.

147.   Yunkan Cetan-maza ĥciĥcika tokeya hihunni nan cokap owinškicatunpi canke el iyotaka ke'.

148.   K'eyaš ecin slolyapšni ca hece, wicaša-yatapi wan tunkanye c'un he pakanpika c'un lila yuonihanpi nan wicaša tona okšan wiyeya talo hanke wašpa yuha naz'inpi, yatapi wanz'i kipiya.

149.   Unma toktok tohanl cez'i naslulkiya canšna talo hanke el egnakapi ke'. Hecetu canšna ĥ'anhiyaĥcin yamahel icu nan owohinsko yatahan can kohan unma kin ape nazinpi ke'.

150.   K'eyaš hehanhunniyan tunweni išta-kablayešni, naitunkap yeya waĥ'anic'ila yanka canke oyate kin apepi kin kohan k'ok'oya taĥnakipcapi ke'.

151.   Wana eyaš wicayušlaĥcin nan hehanl "Wana imapi ye lo!" eya canke hehanl nakeš wakpamni kin wicegna iyayapi nan woyute kin ecekce wicakikpamnipi ke'. Heceš oiyokipiya wicawota ke'. Wana lila hokšila kin wakankiyapi.'

152.   Ake itonacan yunkan hehanl cangleška wan kagin nan tunkašitku kin pacangleya hiyuye-kiyin nan leyekiya ke'. "Takoz'a ptewot'oga inca wan he gle!" eye-kiya canke eya canšna wiyeya wan apaha naz'in canke el iyeya can pte-cepa wan kagmigma gliĥpeya ke'.

153.   Topa-akigle hecunpi nan wana pte kin ecašni s'e top t'a ĥpayapi canke hehanl tunkašitkula kin mila glumin nan wapataimnaic'iya ke'.

154.   Yunkan ungna wocet'unglaya cokap-ti kin tankakula k'un he e ca hocokatanhan unhin nan tima hiyu nan iyotakake'.

155.   Cetan-maza hokšila-kagin nan yanke c'un el pat'a nun s'e iyotaka canke kunšitkula kin:   "Takoš takoz'a wase ececa ca iniyutatkte iĥeyapaya yankin ye, eya yunkan "Etanš tokaka," eyin nan šiyute el egnaka ke'.

156.   Heceš yuha yankahan canke kohan winunĥcala k'un talowašeĥca ece iyoĥpeyin nan wok'u ke'. Can-wakšica wan ogna etan yuha glekiya caš le kigleĥce un itehan hanl wicaĥcala k'un ekta etunwan naz'in nan heya ke'.

157.   "Hunhi, wikoškalaka wan letanhanš canl-wašteya kigle c'un, wanka makotahena comniglakel naz'in ye lo:   "Taku iyokipišni huwo?   Wašte yak'ušni hecinhan woĥinye sece," eyaya ke'.

158.   Etan tohantu yunkan ake wicincala k'un hi nan he wakšica ahi keya ke'.

159.   Canke winunĥcala kin heya ke:   "Takoš, yakiyagle un hehan kal šil-nayaz'in s'e lececa ye, he toka he?" eya yunkan.

160.   "Han, he cuwe un hecel canšilya nawaz'in ye," eya ke';   "Hingnatun canke šic'e-waya ca wancala eša ite wanyak-wacanmi canšna itkop makišice c'un, nake he woyute mayak'u k'un hena hingnaku cinkiye c'eyaš awakšiz'a canke itogna amapa ca waceye," eya ke'.

161.   "He, takoz'a, takole k'u iyeyayin nan ake yau šni, lenakeĥcin tuwa hena yutinktelaka:" eyaya ake talo-wašteĥca ece ihan nan wakši-škokpa nun pakiya akiyecel ognakin nan "Ho, nicuwe le unma kagla, takoš," eyin nan k'u canke akiyagla ke'.

162.   Hinhanna yunkan eyapaha wan hiyaya ke':   "Hopo, itazipa gluwiyeyapi nan wanhinkpe glaowotan po!   Sungila kin ake hiyayinkta ce;   tuwa he o hantanhanš cokap-ti yuzinkte lo unkeyap s'a tka k'un, wana hingnatun ca tuwa sungila kin he o hantanš ha kin yuha nan iye ti el pawoslal iyekiya ece-kte lo!" eya ke'.

163.   Oyate kin hutiyuĥpa š'a s'e ikik'opi nan nakeš wacinksapkic'un wiyeya paha naz'inpi ke'.

164.   Tohantanke cin he hiyaya can o-waxinpi keš tokeške aogin-wicaye s'e lececa, wana sam iyaya canšna kicipapi nan " Toka yunkan yao šni?" eyaya kicicuwapi ke'.

165.   Ake wana wahuwatyapi ca hokšilala k'un iyeštuka kat'iyeya canke tunkašitku kin inyankin nan ha yuzin nan kicicaki ke'.

166.   Ake wi coka hiyaye ĥcehanl eyapahapi nan "Wana ake u we lo, wanbli-luta k'un, šehanštuka waktaya naz'inpi nan wanz'iĥcin o-wacin po!" eya hiyaye c'eyaš wokokipeya u ke'.

167.   Kuciyela kinyan canke wankal etunwanpi can išta wapyela owohinyansyela awicayuta ke'. Heceš tansak t'api nan tuweni o šni, ca hokšilala k'un išnala el iyeyin nan woĥpa ke'.

168.   Hecena tunkašitku kin iyayin nan wiyaka kin iyuha yuz'un nan taku luta iyececašni ca agli nan kal otkeya ke'.

169.   Ho, k'eyaš cin manitu canke oyate kin takuni oslolyešni iyopekiciya-hanpi ke'.

170.   "Unci, ceĥ-ololya yo," eya canke eyak'eš he tanka wan ok'u ca ekta i nan ake agli nan wana ota el unpi canke hena okiyapi ca ptetan, nan taku wocantokpani kin oyaš'in spanyanpi nan wol-wicayapi ke'. Yunkan Cetan-maza-ĥciĥcike c'un ake tokeya he nan el owohinsko ĥopahan ke'.

171.   Ihinhanna kin el winyan wan wicotitanhan uhan canke winunĥcala kin ekta etunwan ape yankahan yunkan hi nan heya ke':   "šcepan, wahoši-umašipi tka lilakel wau wu, talo waštešte yagnaka ca ito etanhan wawatinkte sece, ecanmi nan," eya owehanhan ke'.

172.   "Hinun, tanyan yahi ye, šcepan, le woyute otalaĥcake cin cin hena tuwa tepya okihika. tima iyotaka wašpanciciyinkte," eyin nanwana tohantu ka yunkan woekigle canke imnayeĥcin wotahin nan igluštan k'unhan heya ke':

173.   "Ho, šcepan, le hoši-wahi ye:   Hokšila wan luhapi kin he hiyowahi ye;   he cokapti tankaku kin hingnayinkta cin ca," eya yunkan hecena winunĥcala kin ite-ececašni ... Tehan inila yankin nan ohanketa heya ke':

174.   "šcepan, tuwa akakša ... mitakoz'a eya wowakan yuhala k'eyaš nahanĥcin wakanhez'a k'un ... nakun wicaša-šicela ye šan, tokeške he hingnayanpikta iyecetulašni ... šcepan, oweunĥaĥapi sece?" eya ke'.

175.   K'eyaš hokšila kin nakiĥ'un yanka canke heya ke:   "Gnin nan oyaka yo:   U nan mitokap lel kawinĥ-kignin na 'Cico-wahi ye,' eyinkte lo. Kihunni wal-iyehanl ekta mninkte ... el wai yešan iyemakiyešni nan omayutanšni hantanhaš wakukte ... topa-micohi nan miš eya topa ekta mninkte ... nan ataya tunweni iyemakiyešni hahtanhanš iho po, ecaš, tunweni kici waunktešni ye lo," eya ke'.

176.   Canke winyan k'un he yuha kignin nan oyaka c'unhan wicaša-yatapi ti kin ekta lila ikik'opi nan wanaš unihan ti-ska wan wašte ca pawoslal iyeyapi canke tokiyap oyas'in, "Ma!   He taku tokunpi huwe?" winyan kin eyapi can hunĥ wanaki-ĥunĥunpike s'a k'un hena "k'eya, man, he hokšila-wakan k'un winyan k'upikta ca wicaškan ye, taku slolyayešni!" eyapi.

177.   Kohan hokšila k'un tunkašitku, kunšitku ko tankal yewicaši, nan paha-akotanhan apepilta keya canke wana cin taku eye cin oyas'in ksapya eye cin un, "Toka huwo?" eyešni iyayapi.

178.   "Heci yanka po!   Tohanl cihiyowaipi naniš tohanl ektana waun kin hehanl ecaš ku po," eya ke'.

179.   Wana hecacakte c'un wicašayatapi-cuwitku-hakakta kin aigluĥopi nan u canke iš tima catku el otaninyan yanka yunkan wana inilaĥcin timahel hiyu nan kawinĥ-iyaya "Cico-wahi ye!" eya ke'. Canke "Ha o," eya ayupti nan hecena ena yanka ca kigla ke'.

180.   Wana kihunni-iyehanyan canke ektakiye c'eyaš wakanyan tan-kitun nan ya ke'.

181.   Wana kiyela ya canke wanyak naz'inpi yunkan gliĥpeic'iyin nan icaptanptan-kic'un nan inaz'in yunkan he-ĥota, ĥeĥlogeca wan wašte-iyakapa ca waniyetu-nunpa-wahecetu inaz'in ke'.

182.   Hecena katinyeya maka k'ak'a ya canke wayuš'inyeya ca abeya kiyukanpi yunkan yin nan wicincala k'un atkuku kici naz'in ca itelake el iyaye c'eyaš ecanl ceya iyaya ke' ... kikipin nan ite nakih&ma canke hecena kawinĥ-glicu nan tiyata kiwicaša nan kiyotaka ke'.

183.   Yamni-akigle heceĥcin ecun k'eyaš iyena kokipin nan oyutanšni ke'. Inunpa k'unhan hešlušluta-ic'icagin nan iyamni k'unhan tatanka-tanka k'eyaš he-kagipa ewicakiyapi can heca ške'.

184.   Iciyamni-kicunni k'unhan wicincala atkuku kin iyopeya ke'. "Cunkš, teciĥila taku iyuha icakiz'ešni icaĥ-ciye c'un, lehantu kin oyate wawapilayayinkta yunkan oyakihišni ye lo.

185.   "Hokšila kin le wowakan ikoyaka ca wacinye-pica yešan lugnayinket cin ogna yaškan ye lo.

186.   "Kiksuya yo, cunkš, le ehanke-ukta ce, ake yuzinakinkte cin oyakihišni hantanhanš iyeš nit'e cin he wašakala nan le e woteĥiwalakte lo, oyate wacin niyanpe šan wawicayakiĥtami kinhan"   eya yusyus iwahoya canke wana wiyeya naz'in ke'.

187.   Yunkan ake hokšila k'un u nan kiyela hel icaptanptankic'un nan tatank-ehani wan hehutela ca wokokipeya inyank hiyu ke'.

188.   Wicincala k'un paunka-nun s'e atayela u k'eyaš atkuku takeye c'un hecela kiksuyin na ištogmus yugal-hingla iyaya yunkan tuktel oyuspa ke'.

189.   Hecena taku toka taninšni-hingnin nan hehanl iyuha wacin-kasapapi yunkan hokšilala wan hunkelašni ca pat'a-iĥpeya canke pawe hiyu inaz'inla ke'.

190.   Heceš wana hokšila-wakan k'un winyan k'upi canke tiska k'un unpi.

191.   Itankal wotapi wan tanka takuni iyehanyanšni kagapi ca tuwe kin oyas'in el opapi'.

192.   Nan hokšila kunšitku k'un iš eya woyute waštešte el ai canke nake-kici-yuzapi kin tima yankapi nan wotahanpi yunkan cuweku kin hehanl eš waĥ'anic'ilahe šni, nake woyute iyutan un tipi kin el eyokas'in inaz'in ke'.

193.   Yunkan iš ehankela tankaku kin kišicin nan "Hiya, cuwe, tankani keš un, nahanĥcin unšappapi nan heyounpuzapi nacece ... " eya canke ceya kigla ke'.

194.   Tokiyap ištam-nihanpi oyaĥe-kiyin nan atkuku kico canke ti el i ke'. "Toka huwo, cunkš?" eya yunkan, "Ate, tohantan kin hokši-wašte mayagluha kehe s'a k'un nan mitankala ee haka kta kin un iš hece icaĥ-ic'iye c'un, otaninyan hingnatun nan hetanhan lila waĥ'anic'ila nan owemaĥaĥa ye'.

195.   "Hinhanna kinhan koškalaka wikcemna wati el u-wicayašilte. Hena mihingna kin waluta makagli ca pawoslal iyemiciciyapikte, oyate wanmiciyakapikta ca," eya canke atkuku kin, "Ho, tokša ecamunkte lo, cunkš, cante sicešni yo, nitankala nahanĥci cante t'insya yankešni ca hecun we lo," eya ke'.

196.   Yunkan iyecala iš eya wicincala wan hingnatun k'un atkuku wahokiya ca el i ke'. Yunkan "Ate, hinhanna kipan wicaša zaptan uwicaša ye," eya canke atkuku kin ecunkta keye ke.'

197.   Wana ĥtayetu yunkan hokšila-wakan k'un iš ehankela kunšitku wahokiya canke ekta i ke'. "Toke he, takoz'a?" eya yunkan, "Unci, he cokap-ti wan hu zizi kin he el yin nan, 'Iktomi Cetan-maza hayapi wahokiye, wana eyaš tehan-yakiun ca,' eya yo," eya ke'.

198.   Canke winunĥcala kin tokel wiyukcan taninšni etkiya yin nan tiyopa el inaz'in yunkan tima wicaša ota tilehanyank ipi ca op yankin nan cannunpahan ke'.

199.   "Ake gla na, tase lel yaukte ca caš!" wana ake Cokapti e ca eya-kišice c'eyaš ecanl, "Iktomi-Huzizila, Cetan-maza hayapi wahokiye, eyaš wana tehan-yakiun keye," eya ke'.

200.   "Hunhun!   tokeške takeye! ... Winunĥcala-witkoloka wan!" eyayapi k'eyaš ecanl Ikto iĥaĥa, "Ho, iyekiciciyap!   iyekiciciyap! " eyaya hayapi-waštešte k'eya u tawicutu k'u hena iyuha winunĥcala kin iyekiciciya canke agli nan timahel eyaya yunkan lece takoz'akpaku hokšilala wan naz'ute ĥliĥli ca makoĥlokatanhan yuslute c'un ešni s'e ehank'un he Cetan-maza e hunšeca, ĥopyakel igluecetu nan cannup-yankahan ke'.

201.   Ecekce kic'un nan tawicu kin kico ke':   "Nicuwe ekta yin nan uši yo," eya canke kecaš kici okiciyušice c'eyaš ekta i nan "Cuwe, nico we," eya canke ekta hi ke'.

202.   Wana tima hiyotaka canke heciya ke': "Ho, hanka, wicoiye tanyanšni nun nan nitankala nakun eceĥcin aniyupte c'un, otehi-nic'ila nan nitankala iye ikpaganla canke le kici waun we lo.

203.   "Hecannikte sece;   wana šic'e igluwankatuya ca makiyušekte le, ecanninkte sece;   ungna hecanni ki lo;" eya ke'.

204.   Heceya cante'šica-un hunše, heya yunkan lila nakeš nablayin nan wiyuškin ke';   ecin tiwahe ena okiciyušicapi can iyotan oteĥike cin he un.

205.   "Ho, iyayin ye, manil unyinkte," eya canke tawicu kici i ke'. Yunkan heci tuweni owanyakešni, kul iyunk-kiyin nan yutokeca canke pte winyela ca inaz'in ke'. Yunkan iš eya icaptanptankic'un nan hehutela ca inaz'in ke'. Yunkan hehanl cinca-kicagin nan ake wicaša-kaĥya kici gli ke'.

206.   K'eyaš pte-ouncage yuhapi ecel heya ke':   "Ho, yukšankšan tahin yušnašan omani omani yo," eya canke pte-winyela wan wašte eyapca ca yukšankšan omani nan gli canke hehanl kici kul iyunkin nan icaptanptan-kic'unpi nan iglulakotapi ke'.

207.   Wana wicaša wikcemna cokap ti el ipi canke hingnaku taku agli kin wicak'u ca yublecapi yunkan yašle ha wan hakteiteya hin kin kunlkuntahan ca e nan kangi-wiyaka k'eya nakun wašteĥcešni ca hecel yuataninpi canke eya hecel eyapika ca ticeta tošu wan aiyakaškapi nan kiglapi ke'.

208.   Yunkan iš eya wicaša zaptan Cetan-maza ti kin el ipi nan tawicu kin wopaĥta wan wicak'u canke yublecapi yunkan šungila-wakan wan luta ca opitkteĥcin keš iyakcunnipi s'a k'un he ha kin e ca yuataninpi;   nan wanbli wan wayuš'inyeyal un k'un he tawiyaka kin šayela we ipukap s'e yuataninpi ke'.

209.   Canke hena ticeta eiyakaškanpi ca tokiyatanhan kin oyas'in wanyak-ahi nan tipi kin itankal oĥli s'e han ke'.

210.   Hehanl ake Cetan-maza heya ke':   "Ho, wanhinkpe luhapi kin iyuha wacin ye lo," eya canke mnakiyapi nan kahipi yunkan hehanl tunweya nunp yewicaši ke'.

211.   He toka pahata yewicašipi eyapi kin ecunpi ške'.

212.   Tanyeĥcin wowicak'upi nan wipipi hanl tunweyayewicašipi canke yapi nan paha wan otaninyan tehanl yanka canke ekta iyahanpi nan naz'inpi ca tiyatanhan wanwicayak yankapi ke'.

213.   Yunkan ungna kakšankšan inyankapi nan šina wankal yekiyapi nan hehanl lila iyank glicupi nan glipi ke'.

214.   Wana glipi yunkan Cetan-maza op cannunpin nan hehanl heya ke':   "Ho, koškalaka, makokignake aipazica kin hena ohinniyan ocaicuyaye c'in, tukte-wanzi etu ca taku wašte wanlaka hecinhan omakiyaka yo ... nan mayagna yešni hantanhanš napahunka un epazo wo!" eya ške'.

215.   Yunkan napahunka un epazopi nan ka paha kin akotanhan ataya šina akaĥpap s'e pte hiyot'inza keyapi ke'. "Pilamayayape lo!" Cetan-maza eya ke'. Hetanĥan ca pteoyakapi kin wicakapiĥca ca napahunka u epazo qu kišto.

216.   "Ho, iyuha lel owanz'i yanka po!" eya canke wana tokeni oiye apsil-picašniyan un canke anagoptanpi nan ena yankapi'.

217.   Heceš iye tawicu kin e nan koškalaka wikcemna iye hena wicapahi nan wanhinkpe mnaye c'un hena-yuha-wicakiyin nan henakeca ekta yapi.

218.   Yunkan ainap hel oškokpa wan el tawicu kin iyunk-kiyin nan pte-ha wan akaĥpa iĥpeyin nan oĥlate icaptanptan-kic'un-ši ca ecun yunkan pte-wincala wan wašte ca inaz'in ke'.

219.   "Ho, iyayin nan pte unpi kin wicegnagna omani nan hehanl el maku nan miyohomni iyaya yo. Topa-hecun wo, hohan lena milazata wanhinkpe yuha wiyeya naz'inpikte," eya ke'.

220.   Canke wana wicegna iyayin nan omani kin ecel pte kin owanz'i naz'inpšni ikikiyela hiyupi nan glicu yunkan ihakap ahikawingapi ke'.

221.   Topa-hecun canke iyena sam kiyela upi nan icitopa kin ehanl hecena kici glipi nan ataya owancaya icipahaya unpi ke'.

222.   Canke koškalaka wikcemna wiyaya ewicagle k'un hena k'un hena wana tokel okihi iciyokiheheya kutepi nan wancala esa sutešni. Iyohila un pte wanz'i ktepi ške'. Iye he ehanni tunweni šutinktešni-wakicunzapi canke hecun-wicaya ške'.

223.   Yunkan hehanl wanhinkpe kin pahi-wicaši canke ecunpi, nan tacez'i kin hena nakun. "Miš kohan wagninkte lo," eyin nan tawicu kici glicu ke'.

224.   Heceš kihunni nan "Ho, wanase-ya po!" eya canke oyate kin šika talo yukan can hel lila wiyuškinpi s'a canke wana ake lila wicaškan nan iyuha ekta eyaya ke'.

225.   Maka amanipi canke talo henakeĥcin akupi kin wok'inke c'eyaš kitanyekel eš talo yukan canke šina ogna akiyuha aglipi nan wancaĥcin imnapi nan akap yuhapi ke'.

226.   anpetu ataya talo tokšupi nan hanhepi oiyokpaza hanl igluštanpi nan hehanl wotapi nan oiokipiya wacipi ke'.

227.   Ake iyecala winyan k'un manil hingnaku kici i nan heciya pte-winyela ouncage ogna ĥpayin nan nagwakahin nan pte-hincala wan tun ke';   ptehincala wan ihankeya wašte ca tun ke'.

228.   Cetan-maza he cinca yunkan hokšilala lila iyuškin-itin nan caš-kitunla ke';   tašiyaknunpala wan tunkašila-ye c'un he tokel caš-tun nan yaotanin k'un he eceĥcin ecun ke'.

229.   Ptehincala wan hinša-hinzila ca ciscilala kin hehanni špukešni oiyankela canke oyuspin nan gluha naz'in nan tuweni unšni k'eyaš eyapaha nan heya ke':

230.   "Ho, po, taku maka sitomniyan hiyeye cin, maka akanl taku škanškanyan toni gluha un kin, waĥupakoza kin koya, naĥ'unpi ye!

231.   "Le-anpetu kin hokšila wan micitunpi ca imatan nan ibluškin nan lehanl wana caz'e yukinkta ca "Ptehincala Luta" eciyape lo!   Tuktel wanmiyecilakap nan iyotiyekiya-iteka can unšimicilapi ye, kola!" eya ke'.

232.   Hecunpi nan ake kilakotapi nan wakan hez'ala wan wašte nahanĥcin tunwelašni ca glokipi canke okšantanhan wanyak ahi ke'.

233.   Wana tanka ayela kin ecel tunkašitku wan Cetan-maza wašun tanhan icu k'un he el hi nan gluha yankela s'a ke'.

234.   Wana ĥpecašniyan škehanhanlaka yunkan wicaĥcala kin heya ke:   "takoz'a, nitunkan wana ehantan takoz'akpaku topa ye lo. Hena Iktomi-hu zizi cinca ca ašiĥtinpila k'eyaš takoz'a-wicaya canke wicayuhakel un ca miš le mitakoz'a waunspewiciyinkte lo," eya canke "Ho wo, niš he niye ye!" eya ke'.

235.   Canke mani-unspekiyin nan ia-unspekiyin nan škalunspekiya ke'.

236.   Wanhinkpela k'eya kicagin nan wakute-unspekiya canke lila ohinni tunkasitku gluĥlaganašni ke'. "Takoz'a wana hanskinkte lo," eya yunkan ecetu ke'.

237.   Hecel unpi k'un ungna Cetan-maza hocokatanĥan gli yunkan tilazata tawicu kin wahatkahan canke el glinaz'in ke'.

238.   Yunkan hokšila k'un wana hanskela ca wanhinkpe yuha oinyanka canke kico nan heya ke:   "Ho, cinkš, tunkašila wan maka-opapun kin ekta icaĥ-maye c'un he lena mak'u we lo, wapoštan kin le, nan mila kin le, nan wanhinkpe, tatucuhu-itazipa kin le.

239.   "He tunkašila kin caz'e-ociyake c'unhan namaĥ'un ca lena un iyeniciyinkte lo. Tanyan iyekiya yo, nan tukte ehan tokamunka eša lena icu nan ekta ya yo," eya ke'.

240.   Yunkan tawicu kin iyokipišni nan, "Iš taku! ... wakan tka! ... he takowe tonikakta he?" eyaya iyokteka ke'.

241.   Eyaš ecanl iĥat'in nan, "Wan, okata ca nunwe-unyinkte lo, wana eyaš henala ecun ye," eye c'eyaš wicalašni, "E, le wana niškoyela ihewakiya ca wi mahel iyayešnihanni wagluštankta tka!" eya ke'.

242.   Yamni-iyunge c'eyaš wicalašni canke icitopa k'un han poskiski-yus yeape ke'.

243.   K'eyaš he eka yeš wiyokihišni ca hecetukeš "Ho, eca mišnala keš mninkte lo," eyin nan iyaya ke'.

244.   Mni kin tanyan kaluzin nan otankayaĥcešni k'eyaš eyaš otohanyan copa yapi keš ungnahanla ohipišni k'un hececa ke'.

245.   Mni kin iyosni un ikibleza canke waš'akya nunwanhin nan hehanl ohutata wi akanl-ic'iya gliyotakin nan asnikiya yankahan ke'.

246.   Yunkan ungna tuwa tokiya caz'eyal-kipan ke'. "Cetan-maza!" eye c'yaš winyan ca lila ho-waštelaĥcaka ke'.

247.   Pakas'in owotanlaĥcin iyotakin nan anagoptan yunkan ake eye ke'. "Cetan-maza, tehantanhan wanciyak-wahi ye, leci uwa na!   Ocaštunpika cinla yaun ca le ekta cihi ye!" eya yunkan mni kin lowakatanhan ca he panhan ke'.

248.   "Wan, šma ca toka-waušni ye lo!" eye c'eyaš ake eya canke canzeze hotanin nan "šma ca toka-waušni ce epe lo!" eya yunkan ake kico ke'.

249.   "Hunhunhe, otawat'ešice lo! ... heceĥcin wanmayalaka yacin kinš toka niyeš yau šni?" eya yunkan toka-hiyušni keya ke'.

250.   Canke hehanl, "Ociciyake lo!   tokel yahilu oyakihišni hecinhan miš'eya iyemaceca ye lo!   eye šan ake icitopa-kico canke "ohan," eyin nan oškokpa wan el icaptanptan-kic'un yunkan hehutela ca t'inze s'e inaz'in ke'.

251.   Hecena mnil iĥpeic'iyin nan mniitancan kin waš'aka canke tatanka kin ekta yeš lilakel škinciyin nan iyuwega ke'.

252.   Yunkan hel pez'i-hanskaska-egna wikoškalaka wan pcecela nan puĥike c'eyaš lila winyan wašte ca iĥa wankal ayuta naz'in ke'.

253.   "Ho wo, miyeco ca le wahhi ye. Tokel unkiyuweginkta heci eya yo," eya. Yunkan, "tokša pagoĥ'ape el akan ciyankin nan cankahu el paz'oya niye cin hel kage ciyuzinkte," eya canke, "Howo," eya ke'.

254.   canke wana ake k'in mnil iĥpeic'iyin nan nunwa gnin nan wana mni cokan glapi hanl ungna yuwankal aya ca akibleza ke'.

256.   Hankeya kinyanpšni k'eyaš maĥpiyatakiya yapi ca ecel makoce kin sam ciscila ayin nan hankeya otaninšni, nan heci wankal oĥloka wan tak wokitan ogna maĥpiya-makoce kin ekta aki ke'.

257.   Wana oiyokpaze c'eyaš tiyata kišni canke hokšila k'un cinktakta atkuku ikigni ke'.

258.   "Inila yanka, cinkš, tokša niyate nunwe-iyaya ca tohanl igluštan kinhan glikte," eyahe c'eyaš hankeya iye ko nihinciyin nan hankeya oyaka canke oiyokpazeĥce c'un heca-hanhepi ca can slayapi nan ileya yuha mni-aglagla olepi ke'.

259.   Oyate kin yucik'a s'e hanhepi ataya kipan olipi k'eyaš iyeyapšni ecel anpa ke'.

260.   Toka ektaš iyecinka kipan amani nan ayuptešni canke gli nan "Hiyupi na!   Wicaša wan toki imakiyaye!   Mni-makit'e sece!" eya caš olepi k'un wana iyuha tiyata kiglapi ca ake išnala "Cetan-maza!   Toki ilala he?" eya ceyaya iyaya omani ke'.

261.   "Mni t'e lo," eyapi canke ceyahe c'eyaš kohan cinca kin heya ke':   "Ina, tukte iyehantu ca ate nunwe s'a hecinhan ekta amayin ye!" eya canke ekta ai yunkan hel tahanpe nan heyapi un k'un iyuha pez'i-egna hiyeya ke'.

262.   Yunkan hokšila kin ena iyotakin nan, "Gla yo, ina, lel ate iyawakipekte," eya canke hunku kin nihinciya, "Hiya, cinkš, niyate le mni t'e. Nišnala lel nanke c'eyaš tunweni kiktešni ecel takunl niš eya ayakipakte!" eya wicalašni ke'.

263.   Topa-akigle iyokišni k'eyaš naĥ'unšni kitan canke hankeya, "Howe, eca, eyakeš miye wacin kin ogna yunkan lececa k'un," eya išna woglaglak naz'in ke'.

264.   "Ho, eca cinkš, waktaya lelyanka. Tokša wke waukte," eyin nan kigla canke išnala k'unhan wapoštan-wakan kin he kic'un nan mila-wakan ko gluha inaz'in nan heya ke':

265.  "Howo, tunkašila, wiyohinyanpata toki nanka hecinhan, namaĥ'un wo!   Niye lena ate yak'u nan iyayustak wowaš'ske wookihi yak'u k'un hena lehanl iwacinciyin lo!   Lena ate ena ayuštan nan tancan ecela tokiyaya ca owakilekte lo!" eya ke'.

266.   Hecena iglucetan-tanka nan owotanlaĥcin wankatakiya, ehaš owanz'i naz'in s'e yin nan maĥpiyata oĥloka-ciscila k'un he ogna mahel iyaya ke'.

267.   Hena hel hocokatunyan oyate tanka wicoti ca ikiyela i yunkan eciyatanhan wicaša wan nata kin sapa igluskitin nan itkop u ke'. Yunkan hena škibibila oyatepi ca heya ke':

268.   "Hunhi, hokšila, niyate lel aglipi ca oyate kin wanyakape le. Lehantu ĥcin pazopi canke okšan mimeya wawanyaka kin ahinaz'in ca ena oye iĥpeyape lo. Tka hehantan wana napciyunkcan ye lo," eya ke'.

269.   Hecena hetanhan ya yunkan ake wicoti wan el ihunni ke'. Yunkan hetanhan iš wicašala wan cantku kin ataya ceĥnaga un sapkiyela ca el itkop u nan heya ke':

270.   "Hunhi, hokšila wan atkuku okile keyapi k'un he le niye huwo?   Ho, niya lel agli-pazopi ca oyate kin yumimeya wawanyakimnaic'iyapi na hehanl akiyaglape lo ... keyaš hehantan šaglogancan yelo!" eya ke'. Yunkan hena iš zitkala k'eya Cantku-sapa ewicakiyapi k'un hecapi ke'.

271.   Ake wicoti wan el i yunkan wicaša wan el u ke'. He-oyate kin iš zitkala k'eya. Išta-nica-tanka ewicakiyapi ec wetu canšna ecala agli nan tokeya "makitasakinkte sece" ecinkešni witka tun iyeyapila k'un hecapi ke'. Nata nan tahu opta sapapila nan tansinl holĥotapila k'un hena epila.'

272.   "Hunhi, hokšila, niyate lel aglipi nan pazopi ca oyate kin wanwayak-aikpablayape lo ... leš oye kin yumimeya iĥpeyapi kin ... tka hehantan wana šakowin-can ye lo," eya ke'.

273.   Ake wicoti wan el ihunni yunkan hel iš zitkala k'eya ĥupahu-wanblila ewicakiyapi ca waniyetu ataya ena unpila k'un hecapi ke'. Wanz'i el u na, "Hunhi, hokšila wan atkuku okile keya-otanin k'un, he niye iteka lo. Ho, niyate lel agli-pazopi canke tunweni wicaša-ankantula wanzi wanyakapišni ca icipahahape lo ... k'eyaš letan akiyaglapi hantan wana šakpe-can ye lo," eya ke'.

274.   Hecena hetan inyankin nan wicoti wan el ihunni ke'. Yunkan he iš zitkala k'eya lila cikcik'apila ca zitka-tola ewicakiyapi k'un heca-oyatepila ke'.

275.   Eciyatanhan wicaša wan toic'iyin nan u ke'. "Hunhe, hunhe, Cetan-maza cinca wan atkuku okile-ukta keyapi k'un!   Ho, lel niyate aglipi ca oyate kin išta-wašeca-ic'iyape lo. K'eyaš hahantan zaptan-can ye lo," eya ke'.

276.   Canke ake ya yunkan wicoti canke ikiyela asnikiya ke'. Eciyatanhan wicaša wan ša-ic'iyin nan u ke'. Yunkan he oyate kin šunluta ewicakiyapi k'un hecapi ca etanhan u ke'.

277.   Ake iš eya ecekce eyin nan, "hehehe, wana letan niyate eyayapi hantan topa-can ye lo," eya ke'.

278.   Wana sam kiyela ka ayapi canke bliheic'iyin na ake ya, yunkan ake wicoti wan el atayela ihunni ke'.

279.   Yunkan hena iš šišokapi ke'. Zitkala k'eya ša-zipi ca tapetu holya ececapi k'un hecapi'. Yunkan hena iš, "Niyate letan akiyaglapi hantan yamni-can ye lo," eyapi ke'.

280.   Canke ake iyayin nan wicoti wan el i yunkan he-oyate kin lila i wašicupi ca takeya taninšni wakinice s'e howayapi ke'. Eyaš zitkala k'eya to-sapapi ca wagmeza-owoz'uta iglonicapi s'a k'un hecapi ke'.

281.   "Hunhi, hunhi, kola tanyan yahi ye, ena un ye!" Eya yus unpi ke'. K'eyaš inaĥni-iyayinkta keya yunkan hehanl "O, eca, niyate lel agli-pazopi hantan nunpa-can ye lo," eyapi canke hetan lila iyaya ke'.

282.   Oyate wan pasu tankinkinyanpi nan išta totopi ca tanšil sap-ic'iyapi ca aogluteyapi ke'. "Niyate lel ahipi k'eyaš ake eyayape lo, hehantan wanca-can ye lo. Lila ilala hantanhanš yakigleginkte sece lo," eyapi canke hetan ake iyayin nan oyate wan el wicai ke'. Yunkan hena unkce-kiĥa-oyatepi ca itkop nipi na aglapi ke'.

283.   "Hunhi, hokšilaĥce san ksisya omani ye lo!" eya imnapiĥca ke'. "Ho, kola, le niyate oyakile ca slol'unyape lo. Lel aglipi k'eyaš pcelyela-pazopi nan ake hecena akiyaglape lo ... Hinhanna nakeš le hecunpi ca wawanyaka pez'i inastopi kin nakeš wana he ecel kiglewacin naic'iowotan ye," eyapi ke'.

284.   Canke hetan wotin nan ake ya yunkan oyate wan tanka ca wicaša nan winyan kin mimamapiĥce s'e lececa ke'.

285.   El yinkte c'eyaš cokata taku lila ikik'opi nan iš watuka un t'inkte s'e toka-yešni cnake kal capunpun-okiz'ata wan el iyunkin nan ĥ'ut'a un ceyahan ke'.

286.   Yunkan winyan wan ikiyela hiyaya hunše, "Hinun, hokšila wan le ceya he. Eyaš toštoš mitakoz'a lel ĥpayin nan ceyahe ca!" eyaya nan icu ke'.

287.   He winunĥcala ca tiyatikiya leya agla ke':   "Takoz'a, hocokata wicaša-ksapa kin mniciya pe ... Hena lecala hukuya winyan wan wocantiheyeka ca yešipi yunkan itap gli ye.

288.   "He winunĥcala kin ekta wicaša wan Cetan-maza eciyapi, ca wakan un canke tokeškekel gnayin nan akušipi yunkan wiyeya kan yanke s'e itap agli ca ikik'ope.

289.   "Ehanni he tohunwel leciyatanhan-winyan wan kte ca un nakun wayaka yuza pe. Hel yuha yankapi nan hinhanna wi cokan hiyaye cinhan ktepikte;   ca tokeĥcin oyate wicota k'eyaš tokša tapi kin hanke yatinkte. Oyate henawicakeca k'eyaš iyuha yutapikta ca kpanyela wašpušpupikta keya pe," eya canke ceya yunkan, "Inila yanka, takoš, tokeša tapi yatinkte!" eyaya kigna ke'.

290.   Anpao yunkan eyapaha wan heya hiyaya ke': "Le ehanke Cetan-maza wanlakapi nan hehanl ktepikta ce;   wi hinape cin kici el naz'in po;   ikpaĥicapi nan cin-cokšu yucik'ayela hiyaya po!" eya ke'.

291.   "Iho, iho, takoz'a, kikta, he ociciyake c'un eceĥcin eye. Tiyantani yanka, tokša tapi kin hanpe cicakukte," eya-yuĥica ke'.

292.   "Hiya, unci, unyinkte lo!" eya canke, "Hiya, takoz'a, lena oyate-ikce-kapišni, lena wakan pe. Ikce-ikicicaĥtak ya iyayapi keš ko ksuye-kiciyapi ca woinape ke, ce tiyantani keš yanka!" eya ke'.

293.   (Yunkan kena wakan-wicayuwipi can el takuškanškan keya hinĥpayapi nan wowašipi k'un hecapi ške'.)

294.   Topa-akigle yinkta keya canke hecetu keš kici hocokata wana kata wicahan canke ekta ipi nan wawanyaka kin pazanzan winunĥcala kin takoz'akpaku kic'in yin nan otaninyan inaz'in ke'.

295.   Yunkan cokataĥce cin hel wikoškalaka wan lila winyan wašte k'eyaš winyan-wicašašni-itaya iĥa yanka ke'.

296.   Kablaš yanka canke cana kin el tatanka wan nisko ot'ins iyotakehan yanka ke'. Nan wikoškalaka kin pagoĥape kin opta sutaya yus yanka canke toka-inaz'inšni ke'.

297.   K'eyaš hokšila kin he atkuku kin e ca iyekiya ke'. Tatanka k'un kakel ahitunwin nan hecena gloglo canke oyate kin kahektakiya napa-kinaz'inpi k'eyaš Ptehincala Luta iye he atkuku kin ia-nakiĥ'un canke leya ca okaĥniga ke':

298.   "Hehehe, cinkš, takowe-yao huwo?   Miyeka yeš le anpetu tahena makte-pikte lo." eya gloglo ke'.

299.   "Unci, kiya emagle ye!" eya škinc'iye c'eyaš winunĥcala kin pipiya šina ayut'inzin nan heya ke':   "Hiya, takoz'a, Oyate kin lena ihanhan-iwokicitopi keš ko untunkiciyapi ce epe!" eye c'eyaš lila kitan nan wana unnihan tope-eya canke "ho eca, milazata naz'in," eyin nan kuya egle ke'.

300.   Hecena atkuku tawanhinkpe k'un wanz'i ekta egle nan winyan wan Cetan-maza akšiš yanke un he apaha ke, kunšitku unpi kin etanhan.

301.   Yunkan wanglakin nan, "Oyuspapi, maktekte! -tuktiyecel tuwa eyinkta ca!" eyin, na tatanka kin inap iyaya ke'.

302.   Topa-iyute c'eyaš heyin nan ainap iyaya ca oyate kin he tuwa kecin ignipi keš tokeni hokšila wan niškola naz'in kin eiyapišni canke wana itopa tka hecena wan iyayeyin nan atkuku kin oĥ'ankoya ektašniyan iĥpeic'iya canke winyan k'un o yunkan wokpan wobleca ke'.

303.   Inyan-winyan canke iswula kin wasu šekse napsil yeya canke oyate kin išta iyayapikta-ikopapi un abeya napapi ke'.

304.   Hecena tatanka k'un naz'in hiyayin nan gloglo cinca kin anakitan nan kic'in napa canke oyate kin ihakap iyankapi ke'.

305.   K'eyaš wicaĥcala k'eya kal anunwap cannunpahanpi ca el ikiyela kuwa awicayapi yunkan iyowicakipišni'. "Awicayuštan po. He Cetan-maza cinca wan Ptehincala Luta eciyapi kin kicia ca tunweni owicayakihipiktešni ye lo.

306.   "Ptehincala Luta cik'ala k'eyaš wakan yelakaš tunkan Hetun-win eka yeš iwokpan ye lo, šehanl eš taku inihunkapi ka!" eyapi canke kawingapi ke'.

307.   Heceš iglulakotapi nan hecena wicaša kin hokši-kic'in inyanka ke'.

308.   Wana wicoti wan el glapi yunkan he unkcekiĥa-oyate k'un epi canke wanz'i inyank itkop wicau nan hecena inyankapi ca wicisakip niyašnišni "Hokšila, inaz'in ye!   Tokey niyate yaglogliyaku kin oyaglakinkte, oyate kin wanaĥ'un cantokpani pe lo," eyaya inyanke c'eyaš "Ate, cinkta hecena iyaya yo!" eya yanka canke atkuku kin iyopteya glicu nan ake wicoti-icinunpa k'un el ku ke'.

309.   Hena kangi-oyate k'un epi ca pasu niskosko išta toyela unšišiiya patak wicašipi tkaš hecena ake iyopteya glicupi nan wicoti-iciyamni wan el kupi ke'.

310.   Ake inaz'in-wicašipi k'eyaš hecena glicupi ke'. Hehanl šiško-wicoti kin sam glicupi nan hehanl šunluta-wicoti kin samglicupi ke'.

311.   Hecena kupi nan, kupi nan kupi nan zitka-tola-oyate kin epi nan ĥupahu wanblila kin epi nan hehanl ištanica-tanka kin epi nan hehanl cantku-sapa kin hena iyuha ceyaya inaz'in nan woglak wicašipi keš nawicaĥ'unšni glicupi ke'.

312.   Zitkala kin hena kowicakipapišni k'eyaš Tunkan-oyate kin wicakiglegapikta kokipapi ke'.

313.   Wana unhanketa wicoti wan el Ptehincala Luta toka ektap ihunnila k'un hel glipi ke'. Hena škibibila-oyatepi'. Zitkala kin hena wetu canšna tokeya nahanĥcin wa škanšni kin hehanni glipila nanšna ohotunyankel unpila'.

314.   Can ehanke-icamna nanšna tonana cuwitat'apila k'eyaš nunge-wanil aglihunnila s'a'.

315.   Ohakap iše unmapi kin nakeš glipi.'

316.   Wana eyaš hehanyan wicakiglegapiktešni-iyecetu canke hel asnikiyapi ca lila wicayuonihanpi nan wowicak'upi ke'.

317.   Nan heyapi:   "Ho, lel tonacan asnikiya po, lila wanitukape. Kohan nitunkašila mniciyapi nan tokel gleniyanpikta hecinhan iwanyakapikte lo," eyapi ke'.

318.   Yunkan wicoti wikcemna k'un hena eciyatanhan wanz'ikz'ila tukte iyotan wiyukcan-wopika yuhapi kin he glaĥniĥ-uyapi ca hena witaya wakiya-iyotakapi ke'.

319.   Taku kapi ca tipiyokiheya wan el heyahanpi nan unhanketa wanz'i u nan Cetan-maza cinca kici wicakico canke el ipi yunkan heyapi ke':

320.   "Ho, nitunkašila lecel winiciyukcanpe lo: Ognake wan nicagapikta ca he ogna kuya yaglapikte lo. Tka taku wanz'ila iceniciyapi kin he le e: Maka kin ekta ayahanpi kinhan ognake kin he makicaĥtakapi nan hehanl ikan kin yutiktita po.

321.   "Hececa kinhan yuwankal unkicupikte. taku Wakan kin nicagapi nan unkiš eya unkagapi k'eyaš otakiya škinciya canke eunktunz'api nan leciyana unkayuštanpe lo.

322.   "K'eyaš le ognake kin makicaĥtake cinhan hecel unglapikte lo," eyapi ke'. Hecena zitkala kin iyuha wowaši ecunpi nan taku wan išnala ihankeya kaĥwopikapi k'un heca wan lila tanka wašte ca kagapi ke'.

323.   Coĥ-wanz'ica-swula un kagapi nan hehanl mahetanhan iye wiyaka-tawapi ocaz'e kin iyuha un wogligleya panšyela wašte yuštanpi ke'.

324.   Hehanl coĥwanz'ica hu k'eya lila hanskaska ca yusleslel sunpi nan wahoĥpi-tanka kin topakiya ikanyanpi nan hankeya ikan topa kin hena owanz'ila iciyugmupi nan wiyeya gnakapi ke'.

325.   Wana iyehantu keyapi nan Cetan-maza cinca kici ekta iyotak-wicakiyapi k'eyaš lila tanka canke okacaglaya ekta yankapi ke'.

326.   Heceš mni-c'api mahetakiya cega yeyapi s'e hukutakiya uwicayapi nan wana tohantu yunkan makata asasyela gliyotakapi canke glicupi ke'.

327.   Tuwa wanwicayakin nan oyaka canke maka glakinyan anawicatanpi k'eyaš Cetan-maza iyowicakišni ke'. "Mitakuyepi, towaš ako naz'in po, kola pilamayanpi k'un iš ehankela pilawicawayinkta ce," eyin nan yuwakanyeĥcin wahoĥpi kin makata iwotoya icaĥtakin nan hehanl ikan kin el yutiktitan yunkan maĥpiyatanhan yutitanpi nan wahoĥpi k'un yuwankal glokiyaglapi ke'. Ihinhanna yunkan zitkala-oyate kin wikcemna ataya wahoĥpi k'un oz'ula napogna wicayuzapila s'e yankapi nan hukuta hipi nan makowancaya iyayapila ške'.

328.   Nakeš hehanl Cetan-maza oyate kin ekta wicagla yunkan tunkanku wicaša itab k'un wana wicaĥcala ca el u nan "Ha o, ha o, takoš, išnikal eš, išnikal eš" eyaya yustosto nan heya ke: "Takoš, nitawin, nikun, nikunši, nitunkašila, nitunla ko iyuha ceya-iglat'api nan wašiglape lo. Tanyan yagli ye lo!" eya.

329.   Canke Cetan-maza tianakitan yunkan tawicu kin išta napopoyela itkop u canke poskiskin gluzin nan, iš winyan kin cinca zaniyan wanglake c'un un ceya.

330.   Nan ihakap oyate kin icak'oyela wanyak-inaĥnipi un au ki'.

331.   Yunkan hehanl winunĥcala wan unciye c'un he el cinktakta šil-woglak-hi ke'. "Takoz'a, tokaniĥan canke Ikto el wai nan unšiši-iya hepe: 'Takoz'a, sunkala tokeške iyeye-pica heci iyukcan na ecel ecun-wicakiyin ye,' epa, yunkan 'Iš hece witkotkoka ca toka^an kin tokel iyomawaz'a ka. Wicaša wanz'ila taninšni wan wotanka ke!' eye, takoz'a, nan pacekcek iyemaye!" eya ke'.

332.   Canke Cetan-maza "Hu-zizila aku po," eya canke aglipi yunkan kakiyana u kin hahanni ia au nan "Hunhi, hunhi, misun, tanyan yagli ye lo, yate kin ataya waĥpani-wicayaye c'un, canke ceya-iglat'api k'un. Wicaša kin ceyapi un t'api yunkanš iše lehanl wana okanheya munka tka ye lo!" eyaya u ke'.

333.   Canke heceš Cetan-maza iyopeye-wacin k'un iyenaya ke'. "Iš ektanĥcin, taku-waĥteka ca un tuwaš iglucanze ka!   He Ikto ee nacece cin!" eya ke'.

334.   K'eyaš kunšitkula k'un sakye gluha naz'in nan Ikto el iyaya yunkan kabloblo nan hecel un canl-asni-ic'iya ke'.

335.   Yunkan hehanl eyapaha wan hiyayin nan "Hopo, woyute wašte yagnakapi kin Cetan-maza kau po! " Wotinkte lo!" eya canke wiyeya yuha yankapiĥca wasna koko kahipi ke', nan papa pusyapi kin wokpan oz'ukz'ula koko. "Ehaš ota nacece c'eyaš tokša tawicu nan kunšitku kin kicignakapikte cin," eyapi ke'.

336.   Heceš oyate wol-wicakiye s'a k'un iš ehakela wol-keyapi canke wicoti kin ataya kata wicahan ke'.

337.   Heceš hokšicalkiyapi-oti kin tima yankin nan wotahe ĥcehanl tuwa tilazata hinaz'in nan tiogeya "Cetan-maza, hinapa yo!" eya canke inapa yunkan wicaša wan tokiyatanhan hi nan hel naz'in canke "Toka huwo?" eya yunkan heya ke':

338.   "Hehehe, kola, heceyaš yagli-otai ca nagi yeciye-wakapin k'eyaš leci wiyoĥpeyata nitunkašila wan wahoniye lo.

339.   "Takoz'a ecelaš wacin-waye, kicoya po,' eye lo. Teĥiya waakipa ca iyotiyekiya kigla ke'.

340.   "Ho, gnin nan tunkašila kin okiyaka yo, tokša wahiyukte," eyin nan tima glicu ke'. Canke ka wana wiyoĥpeyatakiya kigla ke'.

341.   Oglaka yunkan tawicu kin ceyaya iyokišni ... Hiya, ninktešni ye, kitan ecinyelaš le yagli k'un!" eyaya k'eyaš cinca kin heya ke': "Hiya, ina, heyešni yo, ate tokiyap wacinyapi ca ekta yunkte," eyin na wapoštan nan mila, wan ko wakan k'un hena kicu canke iyaya ke'.

342.   Yunkan he waĥpa-tanka ca kico hi ške'.

343.   Canke kigle c'un ecel yin nan wiyoĥpeyata maka opapun kin ekta tipi wan wi u kin ekatkiya etunwan han yunkan tima wicaĥcala wan okate eyaš šina pamahel icoma yanka ke'.

344.   Canke tima iyayin nan, "Ho, tunkašila, miyeco ca le wana wahi ye lo, toka huwo?" eya yunkan lila ite ekta cante šicela ca tanin ke'.

345.   "Hehehe, takoz'a, mni kin kowakatanhan oyate wan yankapi yunkan etan wicaša k'eya azumayanpi nan nata wamašpapi nan akiyaglapi ca le teĥiya makakiz'e lo.

346.   "Canke tunkin paha kin he tokeškekel iwekcu yunkanš, ecincin le mankin nan waceyahe lo," eya ke'.

347.   Heyin nan šina kazamni yunkan nata kin ataya šayela štaštaya ececa ca lila owanyak-šica ke'.

348.   Cetan-maza ĥnaĥna nan inapa ke'. "Waĥtešni šicapi kin ... hinyanka yo, tunkašila, tokša waglikte," eya canke lena "Haye, haye!" eya-niya tkaš hecena iyaya ke'.

349.   Otohanyan yin nan hehanl wapoštan wan cetan-tanka šašte ikoyake un he kic'un yunkan cetan-tanka-hingla canke kinyan yin nan wicoti kin aokawinga ke'.

350.   Iwakcipi ca hocokata oiyokipiya wacipi canke hukuciyela kinyan yunkan canwakan wan cokap glepi ca heciya wicaĥcala nata-ha k'un he ikoyaka ke'.

351.   Canke waape unhin nan wana hehanl takapsicapi ca canwakan k'un hetan oeyaye kagapi nan wana akoketkiya inyankapi canke wawanyaka kin iyuha etkiya etunwanpi hanl kinyan hiyu nan yupsak icu nan yuha glicu canke woza-wica hingnin nan kuwapi ke'.

352.   wunkan wanz'i wicaĥcala-ksapa ca heya ke: "tunweni makaheyayapiktešni ye lo, ayuštan po!   Cetan-maza eic'iye c'un he e ye lo!" eya ke'.

353.   Canke wana yuha ku nan iglulakota nan wicaĥcala k'un ti el gli ke'. Ecel unkiciciyinkte eyaš lila tate-kapuzin nan yugmusya suta canke toel spayenyin nan wana eyaš štašta nan zikzica canke ecel iyaskap-kiciciyin nan asniyan ke'.

354.   Canke wicaĥcala k'un lila cante wašte ke'. "Haho, haho, toka yelakas takoz'a, ciglaĥnigin nan wahociye c'un!   Ho, takoz'a, wacicukte lo. Taku ikpahela-pilamayayeca caš.

355.   "Ako hel wikan wikcemna kakša otke lo;   wanz'i kaĥnigin nan icu wo," eya canke wanz'i wašteĥcešni ihankeya otka ca icu ke'. Yunkan hehanl hey ke: "Ho, takoz'a, tankal šunka-wakan wikcemna naz'inpi ce wanz'i oyuspa yo, he nitawakte lo," eya canke inapin nan wanz'i acik'alaka ca hinzila ca kaĥniga ke'.

356.   Tunweni hecunšni k'eyaš wikan kin iteha-kaĥya yuiyapehan icu yunkan šunka-wakan kin hotuntun el u nan pa ogna iyekiya canke kal kaška egle ke'.

357.   Hecun nan tima ki nan "Ho, tunkašila, šunka-wakan wan iwacu we lo," eya yunkan, "To, tanyan ecanun we lo, takoz'a. Miye le šunka-wakan wakage lo. Maka un wicawakagin nanšna can huye-wicawakiyin nan iwaštela hektatanhan patan iyewicawaya can manipi nan šunka-wakan ca ni iyayape lo. Lecala s'e le iyecinka ic'icagahanpi ca pilamayanpe lo.

358.   "Minape un lena wakage c'un etanhan tokša tukte ehan maka sitomniyan šunka-wakan yukanpikte lo.

359.   "Tokeške he tokeya wakaga yunkan elaĥcin iyacu we lo, hecetu we lo, takoz'a," eya ke'.

360.   "Ho, le yagle c'eyaš hakiktašni gla yo. Ehanke blo wan el iyaya he cinhan hehanl nakeš hakikta yo Tokaš oĥpe wanz'i nihakap yapikte sece. Hecetu hantanhanš hena nitawakte lo," eya ke'.

361.   Canke hetan glicu nan hinzila kin ecela gluha ku k'eyaš hakiktašni ku nan wana ehanke bloya wanka ce el iyahin nan akotanhan wicoti kin otaninyan glinaz'in canke nakeš hakikta yunkan šunkakan eyapila kin blaye kin ataya ihakap ahinaz'in ke'.

362.   Hunĥ cincala iyowš'iya unpi ca kakel-inaz'inpi kin hecena azin inyankapi ke'.

363.   šunkakan wašteštepi canke awicaki-inaĥni k'eyaš tikiyela gla yunkan tuweniĥcin unšni ke'

364.   Nakeš wana hokšila wan mayatanhan inyank ku nan "Ate, he niye k'eyaš ozuye ca watakpe-upi keyapi nan iyuha napape lo. Miye ko owapa k'eyaš nake, 'Ate hee yelo,' epin nan inyank wagliyaku k'un," eya ke'.

365.   Canke Cetan-maza iyuškinĥca, " To, tanyan ecanun we lo, cinkš;   ho, ekta yin na 'Tunkašila, ate gli nan taku k'eya awicagli ca iyuha yakupikte lo,' eya yo," eya canke mayatakiya inyankela ke'.

366.   Oyaka canke oyate kin taku wanyakapikteĥcin un lila aglihunni nan tunweni šunka-wakan wanwicayakapišni nakeš lena tlkaheyapi canke okšan itunpa wicanz'inpi, yunkan Cetan-maza heya ke':

367.   "Ho, ihankeya naz'in kin he hiyukte lo," eya canke hiyu yunkan šunka-wakan kin wanz'i oigluspe-kiyin nan hehanl iyokihe kin he ecun nan hecel ayin nan ecel iyuha wanz'i yuhapi ke'.

368.   ake piya okawinĥ-gli nan ake, nan ake. Hecel wana wicaša iyuha šunka-wakan top wicayuhapi ške'. Heciyatanhan ca le wicoĥ'an kin u keyape lo. Wicaša wanz'i unšiya icaga keš wana tohanl šunka wakan top okiĥi canšna hetanhan wicaša-kiyapi kin he.

369.   Hecena ota ena unpi canke hena Cetan-maza cinca kici gluhapi ke'.

370.   Hehanl Cetan-maza heya ke:   "Cinkš, pahata unyankinkte lo. Taku wan lila tkeya awacanmi ca nayaĥ'unkte," eya canke kici iyahin nan wana ekta yankapi yunkan wiyohinyanpatakiya etunwan yankapi canke hecetkiya epazo nan heya ke'.

371.   "Ho, cinkš, kakiyotan maka-opapun kin ekta imacage lo. Wicaĥala wan winunĥcala wan kici icaĥmayanpi nan lila temaĥilape šan ihawicawaktašni omani-wahiyu we lo.

372.   "K'eyaš tokša tohanl icimani-wakapin kinhan ekta wicawagninkta kepa ca lehanhunniyan amapepi k'eyaš wicawagnaye lo.

373.   "Hehehe, tunkašila ahitunwan yankahela sece lo, cinkš. Ca oyakihi nan tawat'elyaya hecinhan ekta ninkte lo. Nan leci oyate-tanka el imatancan nan henakeĥcin wacinmayanpi canke iĥpeya iwicaglabla owakihišni ca olakinkte lo.

374.   "Nan nitunkašila iyeš leci uwicayašikte lo. Tokša leanpetu kin šunka-wakan maka owancaya oblubleca ca tohanl hena ekta ihunnipi kinhan hu-ya upikte lo. Len un iyeniciyinkta ce yuha nan iyaya yo ... waktaya omani yo, cinkš cinkš, canku ogna taku wakan yunke lo," eya canke wana ka iyaya ke'.

375.   [Nakunš leya keyap šan weksuyešni'.] "Cinkš, wiyoĥpeyata oyate wan la-namahunpi ca hena taku wicawaye lo. Tohanl oteĥi wanz'i el nawaz'in canšna hena omakiyape lo. Ca niš eya wonihinciye nihiyagla hantanhanš 'Cetan-maza atewaya ca Ptehincala Luta emakiyape lo,' eya yo, tokša hihunnipi nan oniciyapikte," eya ške'.

376.   K'eyaš hokšila canke katinyeya yešni ke'. "Towaš waziyatakiya s'e yukšanyan wahiyayinkte, makoce wanblakinkta ca," eyin nan heceš yahan ke'.

377.   Yunkan wicoti wan kakiya otanin canke wana ecekiya cankuya yunkan kušeya wohešma-mahel cawagna nan wikoškalaka wan lila winyan wašte ca išta kin ehaš asin-sloyapi s'e, hacocola makikceya ĥpayaya canke ali tka-ke'.

378.   "Tokeške le nunka he?" eya yunkan "Niyate kici woyaglaka ca nawaĥ'un nan letkiya yaukta kehe c'un he nakun nawaĥ'un we.

379.   "Nan atayela wicotita yai hantanhanš tuweni wanciyakinktešni kin slolwaya ca le kušeya munke. Ena un na, tokša miye tokeya wagnin nan ehankela yaunkte, tipi wan tiihanke el han ca he wati ye," eya ke'.

380.   Canke hena kici un nan itehan yunkan winyan kin išnala kigla ke'. Ohakap iš eya ekta i yunkan tipi wan ke c'un hel hokšicala wan nakeš-tunpila-iteya ho-kinšyela ceyela canke tima i ke'.

381.   Hokšila wan watoketuka ca hokšicalala wan lila ciscila ca awanyakela k'eyaš nunpin locinpi canke ceyahanpi ke'.

382.   "Toka huwo?" eya yunkan "Tanke canmahetankan gli yunkan le ikpi-gnak gli nan tun nan iĥpeya iyaya ca le awanblake lo. Hanhepi ake wicaša wan kici iye lo," eya ke'.

383.   "Hunhi, hecetu hecinhan le micinca ye lo. Ce tanhan tanyan awanmiciyanka yo" eyin nan inapin nan wakinyan kin hoyewicakiya ke'.

384.   Yunkan agna yankešni s'e wakinyan agli nan ĥuĥugahe sekse hiyuyapi ca taĥca wan kiktepi canke patin nan tašaka kin he lolopyin nan wahanpi-kaga ke'.

385.   Nan heya ke:   "Ho, tanhan, tacantoge kin icu nan paĥlokin nan etan wahanpi kin le nitunškala az'in-kiya yo. Nan tapi kin španšni cikciscila wašpušpu nan k'u wo. Tokša napcinkte," eya canke hokšila k'un tunškakula kin awanglaka ke'.

386.   Yunkan ungna anpetu wan el hokšilak'un tiyoceyahan canke Ptehincala Luta el eyokas'in yunkan heya ke:   ":Tanke gli nan leya lo:   'Cewinš kiwakanyeš le icaĥye-wacani ke!' eyin nan nunpin iciyaunpapi ca ksuyeunyanpe lo," eya ke'.

387.   Canke wicakigna nan "Ehankel e he taku-winyanka ca magnaye lo!" ecin ke, nan šteic'ila ke'.

388.   Ake taĥca wan wakinyan ktewicakiyin nan agli yunkan hokšila kin tašaka kin hena iciyakaškin nan pusya otkeya ke'. Nan wana wakanhez'ala kin škehanhanla yunkan tašaka kin hena napokaškela kin el iyakaška ke'.

389.   Hecun nan eya tanhanku kin hecel eyeši canke, paha wan akanl tunškakula kin gluha inaz'in nan heya ke:   "Iyuha naĥ'unpi ye. Tanhan unspemakiye cin ogna waepinkte!   Mitunškala iyotiyekiya icaĥwakiye c'un, hunk-cola k'eyaš bluicagela k'un, he nakiciĥ'unpi ye.

390.   "Letanhan tokatakiya caz'a yukinkte lo. Tašaka-Yušlašla eciyapikte lo. Ca wicacaz'e kin he oyate egna otaninyan unkte lo!" eya yunkan wakanhez'ala kin naĥ'unla s'e škehanhanla nan tašaka šlašla-hingla škanla ške'.

391.   Yunkan tankeku-witkowin k'un ake tokiyatanhan glihunni nan "Lowacin ye. Taĥca yatahanpi kin toka ca omayak'u šni. Ecanl le ece yuha yaškan nan caz'e ko laotanin ye. Tantanyanicageca ca!" eya ke'.

392.   Hecena ake tokiyotan iyaya canke Ptehincala-luta lila canzeka ke'. "Nitunškala ikikcu nan kakiya can-wakan kin hel oĥlate inaz'in yo. Kola awowicawaylakinkte!" wya canke ecun ke'.

393.   Yunkan wakinyan kin išiksin-agli nan maĥpiya-glakinyan ataya oile s'e okiwanz'ila tunwanpi ke'.

394.   Canke hokšilala k'un tunškaku kici ištogmus oiyanicapila yunkan wana kaska iyaya canke wanyakapi yunkan tankeku wan winyan-witkowin k'un he ticokap kablaš t'a ĥpayin nan ikiyela wicaša wan hehanl kici un yunkan he iš eya t'a ĥpayin nan oyateunmapi kin iyuha tokaĥ'anpi ke'.

395.   Yunkan ehank'un hena igmun-tanka-oyatepi ca maka owancaya abeya napapi nan hehantan tunweni inunpa witayela ošpayetunyan-un-iyowinwicakiyapšni ke'. Ecakel ocin šicapi kin he un.

396.   Hokšilala wan tunškaku nikiyela k'un hecela wowakan k'upila canke waokihiya ula ke'. "Nitunškala awanglaka yo. Tokša lel wagli nan aciglapikte," eya ke'.

397.   Hetanhan wana yin nan tunkaVitkula wan tašiyakpnunpawicašala k'un he ti kin etkiya owotanla nakeš ya ke'.

398.   Wana kiyela ihunni yunkan paz'ola wan akanl tuwa išnala holyela yankin nan ceyahan ke'.

399.   Kiyela ya yunkan he wicaĥcalala ca wiyoĥpeyatakiya etunwan yankin nan ceyahan ke'.

400.   Anagoptan inazin yunkan heyahan ke:   "Takoz'a, yaglikta kehe cik'un. Toki ilala huwo?   A-hun-hun!   A-hun-hun!" eyin nanšna wana tehan-heyelayelaka awicakehanhan-caokit'a ke'.

401.   Canke el i nan "Tunkašila, ayaštan yo. Ate wahoši-umaši ca le wanciglak-wahi ye lo.

402.   "Ate leye lo:   'Tunkašila okiyaka yo:   tohanl icimani-imnamic'iye cinhan waglikte lo, epa tka leciya oyate wan tanka awanwicablaka canke toka-wakušni ye lo.

403.   'Keyaš le-anpetu kin šunka-wakan k'eya maka owancaya wicabluobleca ca tohanl tunkašila taoyate kin ekta ihunnipi kinhan hena hu-ya ekta maku kte lo, taoyate op,' -ate heye lo, tunkašila." eya ke'.

404.   Yunkan šika wicaĥcalala kin wana tunweni iĥašni ceyapi ece ecunla k'un kitaĥcin wiyuškin nan yušinšinyela iĥa canlwašteye kici ki ke'.

405.   "Winunĥcala, mitakoz'a Ptehincala Luta le e ca gli ye lo. Takoz'a Cetan-maza le cinca caš eyaš glaotanin k'un, le e ye lo!   Nakunš takoz'a, lecala Tašaka-yušlašla eic'iya wan nicinca keyapi ca nawaĥ'un we lo," eya ke'.

406.   Hoceš kunšitkula k'un cancan s'e wokihin nan wok'u canke wotin nan asnikiya ĥpaye cin el okšantanhan wanyak-ahi ke'.

407.   šunka-wakan ahikta oyaka canke lila ikik'opi nan wanwicayak-inaĥnipi ke'. Nan iyuhaĥcin wiyoĥpeyata Cetan-maza taoyate kin ekta wicayapiktan nan heci eca-unpikta keyapi ške.

408.   Wana akiyagla canke ištinmapikta yunkan, kan kin iš heyaps'a ke cin, wicaĥcalala kin iglašicela ke'.

409.   "Takoz'a, lila tanyan tuweni tokayešni waunca yunkan lecala s'e toka wan teĥiya makuwa ye lo.

410.   "Hankeya wacin yewayešni nan 'Hinyanka yo, tokša takoz'a micigli kinhan kici ecanunkte!' epahe c'eyaš niyate toki iyaya taninšni canke wana lehan-i iĥaĥa-makuwa ye lo," eya ke'.

411.   Canke, "Tokašni ye lo, tunkašila. Ate tawowakan kin munkta-iyowinmakiya lo. Ca tokša hinhanna kinhan el mninkta ce, ištinma yo," eya ke'.

412.   Wana hinhanna tkaš ekta i yunkan he toka k'un he sinteĥla ca tuktel tašiyaknunpa wahoĥpi-glepi can pez'i-egna canke ekta kakša iyunkin nanšna witka kin wicakiyaĥuge s'a ke'. Ho, k'eyaš wakinyan wicakipan canke hipi nan ket-iĥpeyapi ke'.

413.   Yunkan wanaš šunka-wakan k'un wiyoĥpeyata paha wan glakinyan yanka yunkan he hiyahanpi canke Ptehincala Luta iyuha awicagli nan wicakpamni ke'.

414.   Heceš oyate kin ataya iglakapi nan wana ĥ'anhiya wiyoĥpeyatakiya yapi k'eyaš kohan Ptehincala Luta oĥ'ankoya kigla ke'.

415.   "Ate, wana tunkašila taoyate op upe lo," eya canke yaotaninpi ca wiyeya oyate kin yankapi ke'.

416.   Yunkan wetu hanl hinhannaĥcin wanz'i tokeyalaĥcin hihunni nan paz'olala wan akanl hinaz'in nan eyapahala ke:   "Ptehincala Pi Napin!"

417.   Yunkan Cetan-maza tunkašitkula k'un he e ca iyekiyin na gliyoi ke'.

418.   Onaĥ'un-wašteya hotaninla canke oyate kin ikiblezapi nan wiyuskinyan itkokipapila ke'.

419.   Ho, hetanhan ca le wetu can wana tohanl tašiyaknunpa kin maku ziyehcin aglila nan hotunpi nan "Ptehincala pi napin!" eyapila can ake piya wicakini ye lo.

From "Lakota Texts" by Ella Deloria,   1932.